政壇：政商定格：中山青協聚會歎金門高粱
金至尊數碼行政總裁Johnny吳傑莊喺年前創立中山青年協會，日前就同班兄弟姊妹聚會，與會者包括孫中山曾姪孫、孫必勝囝囝孫偉倫，以及名媛趙曾學韞二仔趙汝珩同許晉亨外甥郭永亮等。
Johnny話舊年率領一眾會員到台灣訪問交流，其中一個團體非常好客，臨走前送咗支金門高粱酒畀佢哋做手信。支酒有成三公升咁多，佢諗極都唔知點飲好，直至當晚開會至有機會攞出嚟同會友分享。佢話支高粱香氣撲鼻，入口順滑，但酒精有五十八度，奉勸大家飲完唔好揸車喇！
玩具公司太子爺Albert潘偉業就即場宣布明年一月，趕喺龍年吉時同女友鄺晶晶拉埋天窗。佢話自己唔係中山人，但有兩間玩具廠喺中山，都算得上係半個鄉里。
吳傑莊（中）同一眾中山鄉親友好品嘗金門高粱酒，包括孫中山後人孫偉倫（左一）同何漢文（右一）等。
潘偉業（左）同女友鄺晶晶下年將拉埋天窗。
「金門高粱酒」係台灣金門縣特產，芳香濃郁，入口順滑。