政壇：搞搞政：莎姐拒同梁營大和解？

提名唐唐參選特首嘅富貴黨副主席「莎姐」周梁淑怡同梁營前競選辦主席張震遠，尋日前後腳出席電台節目，主持人諗住邀請莎姐留低同張震遠傾幾句，但莎姐思量數秒後話約咗個孫，未有應承留低，即使主持人死纏爛打，佢都話以守時為由，話下次先至再傾。

莎姐喺行動上未有表現「大和解」，言語間講起CY亦好有微言。佢話對CY首個印象係「好密實」，唔係個好易同人哋好friend嘅人，又爆料話雙方認識多年至今都冇試過單對單食飯傾偈，語畢又搵CY算帳，話對方曾喺特首選舉提名期前應承請佢食飯，但最後都冇請到。

被問到擔唔擔心富貴黨會被「大報仇」時，莎姐話唔怕被投閒置散，語帶輕鬆咁話萬一不幸被秋後算帳，嗰條隊都好長喎，又話聰明嘅特首應該唔會以報仇作為準則。佢仲酸溜溜咁話至今未收到CY嘅橄欖枝，加上好多人仲排住隊，自嘲可能富貴黨未夠重要到成為統戰對象喎！