政壇：劉夢熊倡特赦村屋僭建
新界村屋僭建清拆問題令一眾鄉紳同政府關係勢如水火，喺發展局局長林鄭月娥強硬執法下，到時都唔知點收科。喺呢個膠着狀態下，早前因「流浮山鄉事飯局」同班鄉紳搞到面左左嘅全國政協委員劉夢熊，尋日忽然挺身力撐村屋僭建，佢建議政府特赦結構安全嘅村屋僭健，透過補地價理順僭建，仲話：「唔係話有錢大晒，而係要付出相應代價！」
劉夢熊話林鄭太過「書生氣」，強調若政府強行清拆村屋僭建只會淪「流血事件」。佢諗咗個法理情兼備嘅特赦僭建方案，就係擇個日子劃線，喺嗰日後，所有僭建一寸都唔准再起；至於結構安全嘅僭建就透過補地價繼續存在，但有即時危險嘅僭建就必須取締。今日佢會同各鄉紳食飯商討，身兼策略發展委員會委員嘅佢，稍後就會向策發會提交報告。
劉夢熊建議透過補地價嚟理順村屋僭建。（資料圖片）