叮走周兩鑊 全民皆快樂

叮叮叮！太一叮叮盡庸官劣吏，有一件可算極品，鑊鑊新鮮鑊鑊甘，每周衰幾鑊，唔叮唔安樂。冇錯，呢個就係人稱「周一鑊」嘅食物及衞生局局長周一嶽！

周一鑊呢個大名，好多市民都刻骨銘心，甚至深刻到晚晚發噩夢。不過，太一叮今日想用另一個名稱呼呢位頭號庸官，叫「周兩鑊」。點解？講起就勁咯，佢尋日連爆兩單大鑊嘢，分別上咗《東方日報》同《太陽報》頭版，風頭簡直一時無「兩」！

周一鑊，呀，唔係，周兩鑊又衰乜嘢呢？《太陽報》尋日頭版獨家古仔，街市最近湧現懷疑落重防腐劑嘅「化妝牛肉」，市民隨時食到肝腎受損，甚至腦膜發炎。咁大件事，食環署居然後知後覺，唔使講，周兩鑊更加係渾渾噩噩，理都懶理。

化妝牛肉食壞人，周兩鑊監管不力，簡直靠害市民。所以話，周兩鑊根本係一件「化妝局長」，整色整水做騷就叻，為官無能，霸住官位長叮唔走，面皮仲韌過不腐牛肉。

周兩鑊嘅另一鑊，由《東方日報》頭版踢爆。同樣歸食環署管嘅鑽石山火葬場，因為火化爐不足，居然超時焚燒屍體，搞到附近居民晚晚食飯時，飯香聞唔到，臭味撲鼻來，咦……幾惡心呀！

咁講啦，無論化妝牛肉又好，火葬場超時燒屍又好，都清清楚楚證明咗一件事，就係周兩鑊不走，市民無啖好食，叮！

話時話，周兩鑊為官八年市民何止無啖好食，孕婦生仔無床位，長者安老無宿位，病人醫病變送命，先人安息無龕位。市民最重要嘅生老病死問題，都被佢搞到一塌糊塗，呢件化妝局長，點再啃落去？

最好笑嘅係，港府換屆在即，周兩鑊自知名列頭號被叮大熱，居然自吹「政績」博留任，自誇解決醫護人手不足大有成效，又急不及待表明願意留低，真係畀佢笑死。

係喎，候任特首梁振英即將新官上任，家陣最需要嘅就係提振民望、樹立威信，啱晒嘞，太一叮畀條好橋你，叮走周兩鑊，全民皆快樂，呢個就係民望反彈嘅最好辦法！

嗱，太一叮咁講，有憑有據㗎，「東方報業民意調查」顯示，庸官之中市民最厭惡周一嶽，近四成人直指應該叮走佢。

民意昭昭，咁啦，周兩鑊以後就叫「周一叮」啦，梁振英組班叮庸官時，一於狠狠叮走佢，免得留喺度害人害物，叮叮叮！