政壇：政商定格：陳文綺慧做東華主席失眠
尋日喺東華新一屆董事局就職禮，「靈芝大王」陳宇齡太太Viola陳文綺慧接棒做主席。今屆總理班底超勁，包括娶咗「中國舒拉寶娃」晏紫嘅「玻璃大王」公子李聖根同亞洲金融總裁陳智思姪女Stephanie陳曉鈴。
Viola就職，九十一歲媽媽、奶奶同親友齊撐場。原來佢前晚緊張到瞓唔着，心情high過出嫁，一度要發短訊向家姐求救。老公陳宇齡就拍心口叫老婆放心做公職，由佢一力打理公司，仲落嘴頭叫歌星家姐陳美齡稍後由東京返港獻唱，幫弟婦籌款。
產後兩個多月嘅晏紫亦嚟撐老公，問B女有冇運動潛質，李聖根話未睇到。咁會否追個龍B？佢話順其自然。晏紫就話專心湊女，未諗過復出喎！
陳有慶孫女陳曉鈴加入東華大家庭。
產後兩個多月嘅晏紫（右），陪老公李聖根（左）出席就職禮。
陳文綺慧（右一）人逢喜事精神爽，老公陳宇齡（左二）、大伯陳柏齡（左一）同奶奶（右二）齊來撐場。