政壇：KK選超級議席吸乾民協

工聯會喺九月立會選舉諗住用「風車效應」，以票后陳婉嫻出戰區會超級議席，利用佢高人氣，同五個直選選區候選人互相吸票，相得益彰。估唔到民協都諗住嚟套「風車效應」喎！

民協新一屆換屆選舉喺上周六悄悄地完成咗，早已放風話唔做主席嘅「老虎仔」廖成利竟「冧莊」再做一屆。原來民協喺立會選舉打算衝出老巢深水埗，老虎仔要領軍到新界西出戰，副主席譚國僑就負責留守九龍西，而資深區議員許錦成就肩負九龍東搶灘重任。但除咗譚國僑嗰席比較安全外，其餘兩人當選機會一啲都唔高。

點解咁擺位？原來要眾星拱照KK馮檢基。因為KK會去選超級議席，佢深知超級議席要全港性樁腳，如果只得老巢九龍西嘅支持實輸梗，其他黨友好抵得諗，硬住頭皮開拓外區嘅票源。

民協呢套A貨「風車效應」，轉唔轉得郁真係好令人懷疑。事關分散晒資源幫KK谷票，贏就當然光宗耀祖啦；如果KK輸咗，其他地區就危危乎，民協分分鐘一鋪清袋。