政壇：張樹槐長跑雨淚汗交融

恒生銀行傳訊及企業責任總監Walter張樹槐爆料，話試過幾次喊住咁跑馬拉松，雨水、淚水同汗水撈埋一堆。佢唔係辛苦到喊，係感動到喊至真，呢個反應可能同佢嘅宗教信仰有關。

佢話最近一次跑喜馬拉雅山，賽事進入第四天遇上滂沱大雨，身邊隆隆嘅雷聲，就好似激勵佢繼續跑，佢話嗰一刻，覺得神同人係何等接近，呢一刻忍唔住一邊跑，一邊喊。

喺雅典馬拉松長跑差唔多抵達終點前，市內播放着《Chariots of Fire》，呢首歌係講述跑手Eric Liddell嘅電影《烈火戰車》主題曲，此名亦出自《聖經》：「他們正走着說話，忽有火車（Chariot of Fire）火馬，將二人隔開，以利亞就乘旋風升天去了。」佢感動到喊，或者同佢希望最終喺跑步時離開世界嘅想法有關，正如佢好羨慕「傳播學之父」Wilbur Schramm喺臨終時，係睇住電視離開世界。