政壇：CY冧工商界 唐人玩失蹤

唐唐雖然得到四大商會同多位工商界中人力捧做下屆特首，但因連串醜聞最終輸咗。雖然CY梁振英當選後已即刻叫人唔好再分梁營定唐營，又話依家淨係得番一個香港營，但多名挺唐嘅商界中人個心到依家似乎仲有啲不甘。CY尋日先後同銀行、工商界代表會面，幾個唐營競選辦成員同支持者都冇影。點解失蹤？係因為貴人事忙去唔到，定係仲唔肯同CY冰釋前嫌呢？

李國寶搵大仔單刀赴會

CY尋日首先同一眾大孖沙會面咗粒半鐘，滙豐、恒生同中銀高層都有出席，唯獨身兼唐唐競選辦主席、東亞銀行主席兼行政總裁嘅李國寶就冇現身候任特首辦，淨係得佢個仔、東亞銀行副行政總裁李民橋單刀赴會。

下晝就輪到CY同之前大部分提名同撐唐唐嘅五大工商組織碰頭。總商會主席胡定旭同唐唐一向老友鬼鬼，早排唐唐仲因為力保肥胡而得罪一班醫學界選委。肥胡尋日話CY同工商界嘅交流氣氛友好，大家都好坦率咁講出業界關心嘅議題。

而一班挺唐嘅立法會議員商界代表，包括有唐唐「家臣」之稱嘅廠商會代表林大輝、工總嘅梁君彥同總商會嘅林健鋒尋日更齊齊缺席，淨係得番梁營、進出口界嘅「象哥」黃定光到場。

象哥就意有所指咁話，選舉已塵埃落定，大家將來應該關心多啲民生發展。唔知各大商會係咪知道多位議員同CY唔妥，特登冇預佢哋一份呢？