烽火台：鬍鬚曾理財哲理

鬍鬚曾任內最後一份預算案，總算獲立法會「官式程序」通過。「史上最廢財爺」盛傳不會留在新一屆管治班子之中，換言之，呢份預算案算係佢嘅「遺作」，隨着夕陽西下，斜陽裏，沒有氣魄更壯，不過，如果佢冇得留低，大家以後唔使聽佢廢噏、亂估盈餘，也算是福氣。

講真，鬍鬚曾的面相，屬「好好先生」型，表面誰也不得罪，要是他生在古時，做官奉行六字訣「少說話，多磕頭」，相信官運也可亨通。

鬍鬚曾做財爺一味靠估，猶幸香港是個福地，不論怎樣估「虧」，庫房永遠水浸，錢多好辦事，於是，不注資六千元入強積金戶口，改為人人派六千元又得，之不過，人哋澳門派錢，派到百姓街坊歡天喜地、笑逐顏開，香港派錢，竟然搞到天怒人怨，坦白講，只有鬍鬚曾才有如此功力，小生不得不寫個服字！

鬍鬚曾沒有佢「真兄弟」貪曾嘅不幹正事，只愛坐富豪朋友私人飛機私人遊艇，之不過，佢亦是「離岸財爺」，經常外訪，與貪曾互相輝映。

身為財爺，鬍鬚曾不知道有沒有撫心自問：自己究竟有沒有做好份工？依小生看，其理財哲理，奉行的是「搞定就是安定，擺平就是水平，無事就是本事，妥協就是和諧」。香港是福地，財政司司長呢個位，不懂理財一樣勝任，觀之鬍鬚曾，信焉。