通識津貼無以繼 教師學生恐通輸

終於殺到嚟，中學文憑試「死亡之卷」通識教育科今日首度開考，「通識通識，通通唔識」嘅黑色笑話會唔會噩夢成真，就睇考生嘅表現嘞。

咁啦，當做試前熱身，太一叮就出條試題考考大家，題目係「通識教育如何避免通輸？」問題如下：「通識教育推行以來備受詬病，課程空泛不在話下，評分更加毫無準則，導致教師、學生無所適從，叫苦連天。在這情況下，政府應該如何抉擇：（A）向學校增撥資源，協助師生克服學習困難；（B）進一步削減支援，任由師生自生自滅。」

各位考生一定心諗，如果遇到呢條題目就發達咯，是非黑白分明，道理一字咁淺，梗係答「A」啦，除非精神有問題嘅啫，點會有人揀答「B」。嗱，尋日係愚人節，不過太一叮唔係同大家開玩笑，真係有人選擇答案「B」，呢班就係特衰政府嘅教育官僚。

件事係咁嘅，○九年通識教育登場，教育局側側膊冇投放專科資源，被教育界嘈到拆天，終於喺一○年向每間中學發放為期兩年、合共三十二萬元嘅一筆過通識專項撥款。有咗呢筆錢，學校就可以聘請教學助理，一來紓緩通識科教師嘅工作壓力，二來提高教學質素，幫助學生掌握課程內容，算係芸芸師生喺通識教學苦海中嘅一個小小救生水泡。

通識教育過去三年劣評如潮，師生苦不堪言，喺咁嘅情況下，當局冇增撥資源協助師生都算嘞，係咪至低限度維持現有支援呢？哈，港府就係縮骨到冇朋友，居然打算由今年九月新學期起停止發放三十二萬元津貼，令師生壓力百上加斤。你話教育官僚係咪反智？係咪等如任由師生自生自滅？

叮佢個鎯鎯，通識者，通情識理也。通識教育問題多多，港府支援居然不增反減，簡直就係通識教育嘅反面教材！

教育局教壞細路，教育界梗係同佢死過啦，家陣發起聯署行動，要求原封不動提供通識津貼，兼且增設常額教席同全面檢視課程，至今已經有二千五百人響應。

一句講晒，教育資源開倒車，通識不成恐通輸。咪話太一叮唔提醒教育官僚，通識教育一塌糊塗，學校、教師同學生固然受害，教育官僚一樣係輸家。咪再縮骨，通識津貼唔慳得！如果唔係，通識科試題遲早會出現呢條題目：「通識科已經無可救藥，民怨沸騰，是否應該一了百了馬上廢除？」