政壇：搞搞政：政府頂層潰爛

前政務司司長許仕仁日前被廉署拘捕協助調查，天文台前台長「黑英」林超英喺網誌話，電視畫面令佢主觀希望「眼前一切是夢境」，佢洋洋五千字勾出政府潰爛三部曲，仲話：「在我當公務員的三十多年中，也見證廣大公務員隊伍的廉潔風骨，我很不服氣，何以會在政府頂層首先出現潰爛？」

破壞廉潔 摧毀誠信

政府誠信掃地嘅序幕，始於教育局局長孫明揚，黑英話孫公喺處理英皇書院縮班一事上「公然說謊」，加上煲呔曾拒接納投訴，為摧毀政府誠信展開第一步，從此「誠信不在是本屆政府的核心價值」，而緊接前政務司司長唐唐「地下王宮」被揭發，政府誠信隨着唐唐「一日一辯解」逐步被擊碎。

但最致命一擊，莫過於煲呔曾連串「沉溺於聲色犬馬、迷失自我、忘掉身份」嘅貪心事件，其後佢諉過於人嘅「道歉」，同埋為「轉移視線」而設立嘅檢討委員會，無一不令公務員痛心疾首。

黑英話煲呔曾帶頭破壞公務員隊伍嘅廉潔作風，引證了官商往來過密「財團政治」嘅惡果，亦反映香港近數十年過度強調金錢同「醒目仔」嘅價值觀。堂堂一區之首亦難逃金錢誘惑，帶頭沾污公職人員廉潔名聲，高官出現連串嘅誠信事件自然成為「必然中的偶然」。但令佢痛心嘅只係少數人，「不幸的是他們佔據了高位」。