政壇：林錦平目標狼且狠

今屆特首選舉戰況激烈，公務員一向政治中立，好多官員對政治敏感字眼都三緘其口，以免畀人話偏幫之餘，亦唔想畀人標籤係邊個陣營嘅人。不過，選舉啱啱結束，有官員就即刻鬆懈，政治敏感度都降低晒，講緊嘅就係副政府資訊科技總監林錦平喇。

林錦平早排接受訪問，講到舊年有招標風波嘅上網學習支援計劃推行成點，被問到政府原先估計有成三十萬低收入家庭受惠係咪高估咗時，佢竟然答：「我哋一開始推個計劃，梗係將個目標定得狼啲同狠啲！」在場嘅人即刻發出會心微笑，仲提佢話呢兩個字好敏感，千祈唔好亂講，但佢仲唔醒覺，仲話呢兩個字冇乜問題吖，有在場嘅人再提佢話選舉啱啱先完嘛，建議佢用「進取」比較啱啲，但佢仍然話用「狼同狠」去形容係冇問題。特區政府換屆在即，好多高官難免擔心自己隨時無得撈，可能林錦平趁機表明立場，做官都要好似特首咁狼同狠，睇嚟佢政治立場都十分正確噃。