政壇：田氏兄弟送禮氹細路
後日就係兒童節，富貴黨榮譽主席田北俊同細佬新民黨副主席田北辰，尋日不約而同去同小朋友玩。兩兄弟喺政治上分道揚鑣，又分別喺新界東同新界西參加選舉，竟然仲有少少心有靈犀。
田少尋日去沙頭角嘅動物農莊同百幾個小朋友燒嘢食，提早慶祝兒童節。班小朋友喺農莊睇吓牛、睇吓羊，又遊吓菜花田，不知幾開心。不過最開心都係收禮物嗰一刻喇，皆因田少好識(o氹)細路，男仔就送玩具車，女仔就送毛公仔。
二少就買咗成萬隻復活蛋送畀幼稚園同各區嘅小朋友，仲同佢哋畫埋一份添。不過依家物價貴，喺香港買雞蛋咁大隻嘅復活蛋要成兩個幾一隻，但網購只係兩毫子一隻，就算手掌咁大隻都係一蚊六毫咁話。田二少就索性上網買，等啲小朋友可以喺隻大蛋上發揮創意。
田北俊（左）尋日去沙頭角同小朋友燒嘢食，仲大派玩具。
田北辰（後排右）買咗成萬隻復活蛋，等小朋友可以畫餐飽。