政壇：青委會終於有90後

自從兩年前一班反高鐵嘅80後圍堵立法會之後，政府就急急腳話要多啲聽年輕人嘅聲音，之不過就畀人踢爆，原來專門研究香港青年發展問題嘅青年事務委員會非官方委員個個都係「老餅」，搵佢哋去聽80後、90後意見，人哋真係分分鐘嫌佢哋唔啱嘴形、冇偈傾。

委員平均47歲

政府成日都口口聲聲話要聽年輕人嘅聲音，但係由政府委任成員嘅青年事務委員會入面唔少成員都有番咁上下年紀。之前政府都喺立法會回應過議員質詢，原來包括青委會等幾個諮詢組織嘅非官方委員嘅平均年齡係四十七歲，如果三年係一個代溝，佢哋同班年輕人相隔嘅應該唔止代溝，而係鴻溝至啱。

掌管民政事務嘅民政事務局局長曾德成，真係唔話佢慢幾拍都唔得，畀人鬧到就嚟換屆先知衰，終於搵咗個90後加入青委會，算係搵番棵樹苗做樣，等青委會冇咁「老餅」。

民政局尋日就公布青委會委任咗三個新成員，包括立法會議員霍震霆大仔霍啟剛、香港研究協會總幹事麥燕薇，同埋曾經喺香港紅十字會協助籌備國際性青年高峰會議嘅90後青年蕭景威，而佢哋嘅任期係兩年。

三個新委員中，霍啟剛係一九七九年七月初出世，係70後掹尾，係得蕭景威一個係冇花冇假90後。蕭景威喺青年活動中都幾活躍，○九年得十九歲時就已經有份出席同籌備紅十字會國際聯會喺約旦安曼進行嘅青年高峰會，相信一定交遊廣闊，可以同啲後生仔同聲同氣喇！但呢棵樹苗對棵老樹有幾大嘅幫助同影響，大家就要拭目以待嘞！