收拾餘孽爛攤子 徹查貪曾順民意

特首選舉塵埃落定，「龍豬」唐英年含淚承認落敗。嗱，曾蔭權就話扮喊掩飾貪腐醜聞，但係唐唐嘅眼淚應該係真嘅。點解？龍豬本來係大熱門，點知自己唔爭氣，私德醜聞爆完一單又一單，結果選情英年早逝，大熱變大敗，換着你都欲哭無淚啦！

至於當選嘅梁振英咯喎，呢兩日應該忙於謝票。話時話，佢要多謝嘅人就多咯，要多謝唐唐自殘讓賽啦，多謝泛民變相幫佢加分啦，仲有一個人佢一定要多謝，就係煲呔曾嘞。

梗係啦，如果唔係煲呔曾管治一塌糊塗，搞到香港民怨沸騰，梁振英又點可以憑一句「求變」口號而贏得民心？所以，梁振英後來居上，笑到最後，煲呔曾居功至偉，叮！

嗱，話煲呔曾施政一塌糊塗，唔係齋噏o架。「東方報業民意調查」顯示，大部分受訪者直指香港隱憂重重，問題多多。好似民生議題方面，三成九受訪者批評雙非孕婦問題嚴重，期望新一屆政府優先解決；兩成五認為房屋及住屋問題不能再拖；兩成四最關注貧富懸殊問題；一成促請改善醫療服務質素。

叮佢個鎯鎯，英國人管治香港百幾年，離開香港時留低一套廉潔制度同一個玫瑰園計劃。點知港英餘孽青出於藍，煲呔曾主政七年，居然為香港留低咁多「遺物」，只可惜無件好嘢，全部都係引致民怨載道嘅管治爛攤子。煲呔曾何止係幫梁振英曲線助選嘅幕後功臣，佢簡直就係香港沉淪嘅禍首！

好嘞，梁振英即將上場，有冇可能撥亂反正呢？機會唔係話冇，不過困難重重咁解。現屆政府留下一大堆爛攤子，上述調查顯示，大部分受訪者認為會對下屆政府有負面影響，五成七估計會令市民對政府失信心；一成九擔心新一屆政府施政備受掣肘；一成五估計新政府執手尾都已經疲於奔命。

咦，咁搞法，下屆政府咪隨時成也煲呔、敗也煲呔？一個唔覺意踩中地雷，好易炸到皮開肉爛。不過咁，計太一叮話齋，謀事在人，成事在天，只要梁振英政府勤政愛民、除弊興利，煲呔曾爛攤子話唔定就係提振民望嘅踏腳石。有個民望低殘嘅貪腐特首墊底，下屆政府政治蜜月期都長啲啦，係咪？

正所謂，新官上任三把火，梁振英如果想樹立管治威信，好易o架咋，太一叮畀條好橋你，上任後即刻雷厲風行徹查貪曾醜聞，肯定有大把市民即刻畀個Like你，叮！