政壇：搞搞政：占算唐唐勝選玄學家跌眼鏡

新一屆特首順利選出，CY梁振英大比數擊敗唐唐同鐵頭仁當選。仲記得當初唐唐被傳出有意參選特首時，民望一直高企，有着坐定粒六之勢，就連部分玄學家、術數師、以至黃大仙靈籤喺年初都預測唐唐會當選，但如今跌到一地都係眼鏡碎。

金榜題名變名落孫山

我哋曾經喺今年一月曾經搵過幾位玄學家同術數師批算疑似特首候選人嘅運程。當時有玄學家批算唐唐龍年行正印運，其八字最似未來特首，應該好大機會順利當選喎。至於CY就行食神運，但食神會制住官星，兩年內嘅官運都唔好。

此外，我哋又到過黃大仙祠求籤，唐唐支籤係第七十三籤「古人孫霖中狀元」，當時解籤佬話籤文意旨唐唐「金榜題名」。不過，唐唐最終「名落孫山」、「鎩羽而歸」。

至於為CY求得嘅係第九十二籤「孔子聞韶樂」中吉籤，意旨CY參選好似孔子為研究韶樂廢寢忘餐，最終大功告成。不過，都係嗰句，每個人對籤文嘅領悟都唔同，而且信則有，不信則無。