政壇：女拔校長撐唐太惹反感
話說唐唐喺特首選舉落敗前，喺多份報章刊登選舉宣傳廣告，刊載一班支持者及市民嘅「挺唐」留言，當中包括女拔萃校長兼婦女事務委員會主席劉靳麗娟，佢撐唐太Lisa郭妤淺嘅一段留言，題為「Lisa，我為你鼓掌」。但尋日我哋就收到投訴，質疑劉校長竟力撐僭建主謀嘅唐太，問佢以後仲點教學生守法喎！
劉校長直指唐太近日出嚟表述「真摯感人」，仲話喺佢身上「看到高質素教育的完美演繹」。雖然劉校長行文隻字不提僭建風波，但相信市民好清楚唐太係唐宅僭建風波嘅始作俑者，但劉校長並未對唐太涉嫌違法嘅行為給予半點指摘，又好難怪有市民反感嘅。但作為婦女界佢咁講都無可厚非。