政壇：CY當選貪曾大鑊

特首選舉曲終人散，選前一直被看淡嘅CY梁振英扭轉劣勢、反敗為勝。作為輸家嘅唐營中人，頓時變成弱勢社群，有工商界嘅人仲喊咁口話好驚CY嘅手段，計我哋話，要驚都未輪到工商界驚喇，貪盡海陸空嘅煲呔曾驚定先就差唔多，事關CY一早表明，當選後佢會依法處理貪曾事件。

貪腐事迹鐵證如山

東方報業集團獨家揭發貪曾醜聞，事件曝光後全城喊打，雖然廉政公署已經立案調查，但係貪曾一日在位，要向貪曾負責嘅廉署可以做到啲乜，市民難免有所質疑。CY當選前接受我哋專訪嘅時候話，佢上任後會將特首申報同公務員睇齊，仲拍心口保證廉署會依法處理貪曾醜聞，佢亦一定唔會作出干預。

其實，呢兩日都唔見煲呔曾出嚟活動，當然冇乜聲氣喇！睇怕佢匿喺禮賓府(目及)實特首選舉，睇到選戰咁峰迴路轉，已經嚇到震晒。

依家CY當選，貪曾呢次真係大鑊喇，事關佢嘅貪腐事迹鐵證如山，無論係接受超豪華款待，坐私人飛機、遊艇，或者向有利益衝突嘅富商，預租深圳豪宅作「曾大屋」作為退休後居所，貪曾統統無得抵賴。

只要廉署呢次揸正嚟做，貪曾就真係係咁先喇，睇嚟佢要好好享受埋餘下不足一百日嘅日子，事關之後佢嘅餘生好可能變成鐵窗邊緣，睇怕佢都有排震騰騰呀！

開講都有話喇：自作孽、不可活，貪曾落得如此下場，確實與人無尤。