劏房問題拖又拖 無殼蝸牛嘆奈何

今日特首選舉，港人既無奈，又期待，事關今次係小圈子選舉，大部分市民無權投票，得個睇字。不過咁，雖然無權投票，但就期望選委能夠順應民意，千祈唔好揀錯人吖。

市民期待新特首可以撥亂反正，皆因對無能嘅曾蔭權政府已經徹底絕望。呢嗱，一班劏房居民以瞓街為特首選舉贈興，抗議當局房屋政策失敗，無完善安置政策。佢哋希望下屆政府落實劏房居民「先安置，後清拆」政策，同埋加快興建公屋。

講起真係羞家，喺香港呢個所謂國際大都市，竟然有十萬人住劏房籠屋，同住喺「活棺材」冇乜分別，唔嬲就假。問題根源係港府土地同房屋政策失當，「高地價、高樓價、高租值」，加上公屋供應嚴重不足，草根市民除咗住劏房，仲有乜嘢辦法喎。其實，今時今日，除咗草根市民，唔少中產人士亦係劏房住客。夕陽政府話就話同意復建居屋，但得個講字，建得嚟蛇都死喇，將爛攤子推畀下屆政府就真。

話時話，曾蔭權上台七年一事無成，經濟畸形發展，民生問題多多，除咗房屋問題，安老、教育、醫療、環保等等，樣樣都搞到一塌糊塗。最離譜就係，煲呔曾親疏有別，所有政策都向大財團傾斜，一味向富人錦上添花，拒絕向窮人雪中送炭，搞到貧富差距愈來愈大，仇官仇富情緒日益高漲，深層次矛盾不斷惡化。

講到深層次矛盾，官商勾結肯定係最最深層次嗰個。大家有眼睇嘞，煲呔曾不問黎民疾苦，一味掛住做離岸特首，成日同富商勾勾搭搭，貪遍省港澳，歎盡海陸空。呢，佢仲未落台，但一早已搵定退路，本來打算租住六千幾呎嘅深圳禮賓府，畀人踢爆先至唔敢住咋。煲呔曾廉租深圳禮賓府，用粉絲價食魚翅，而基層市民就被迫捱貴租入住劏房，用魚翅價食粉絲，你話嘞，呢個世界邊有公平可言，市民點會唔谷氣吖。

上樑不正下樑歪，煲呔曾貪威識食，食相難睇，問責高官有樣學樣，個個又食又拎，收禮收到手軟，真正係大有大貪，小有小貪，蛇鼠一窩。指望呢個腐敗政府福為民開，嘥氣啦。

古人話齋，往者已矣，來者可追。夕陽政府就快收工，新特首今日產生，港人冇嘢好望，惟有希望新特首撥亂反正，令小市民可以安居樂業，有瓦遮頭。