SUN熱辣：飲食業陷絕境

去年五月一日實施最低工資，規定時薪不少於二十八元，打工仔薪酬有保障，惟飲食業僱主卻面對請人難的困境。因員工薪酬暴升，加上工時長，工作辛苦，飲食業已不再受打工仔垂青。行內近月出現缺人潮，有食店因請不到人，停業已經一個月，每日白蝕租金；亦有餐廳因無人洗碗碟，老闆要摺起衫袖自己做；更有食店在時薪急升下，被迫結業。

營造開心環境留員工

灣仔華星冰室股東：「最低工資令我請唔到洗碗工要自己做。」

聘請職位：洗碗工

平均時薪：30元加花紅

「我以八千四百月薪請洗碗工，但大半個月都請唔到，無人洗碗，冰室就做唔到生意，影響口碑仲得不償失。」在灣仔開業約三年的華星冰室股東彭懷安（Eddie）說，為了做生意，他與其他股東被迫親自落場洗碗。過後他終於明白，原來洗碗工作極艱苦，「雖然我跳開舞，有運動底，但洗碗一日成個人已經謝晒，周身骨痛。」

要請好員工寧賺少啲

頂硬上洗碗的日子，Eddie捱了近一個月，每日幫手洗碗，但鐵人也會倒下，經此一役，他認為洗碗工作應多過時薪二十八元，「起碼都三十蚊，另有花紅獎勵。」還要想盡辦法留住員工︰「依家請人，唔再好似舊時咁，以為可以用錢壓人，做老細要諗方法營造開心嘅工作環境。」

請不到人，原來與實施最低工資有關，他稱低技術的打工仔選擇增多，令洗碗、樓面等勞動較大的工作人手流失嚴重，「應徵者唔憂做，見工好似買樓咁，要睇清楚工作環境才肯試工。」人手對餐廳運作重要，Eddie的冰室僱用十多人，薪酬佔營運成本三分一，因不可能減人手，惟有貨比三家，從食材成本方面縮減開支，「寧願我哋自己賺少啲，出多少少人工請啲質素好嘅夥計返嚟！」

廚師時薪倍升餐廳焗執笠

旺角鐵板超純和風日本料理店董事：「最低工資令我請唔到廚師，被迫結業。」

聘請職位：廚師

平均時薪：40至50元

「高峰期，我哋有八至十個廚，成間餐廳有三十幾名員工，依家我哋得三個廚，十幾名員工，我都要落場煮鐵板燒，仲要招呼客人。」受最低工資影響的還有位於旺角的鐵板超純和風日本料理店，董事盧有芬便因此要將開業已十年的店舖結業。

租金升食材貴人手缺

餐飲業向來存在請人難的問題，但自最低工資推行後，拉高全行職位的薪酬，她更深切體會人手短缺的壓力︰「就算時薪去到四十至五十蚊，都請唔到人做廚，聽其他行家講，有啲廚師嘅時薪已去到八十至一百蚊！」

人手短缺影響餐廳生意，在午市、晚市人手不夠，加上鐵板燒烹調需時，「好似漣漪效應咁，燒煮、上菜、執枱，一環扣一環，啲客就投訴咁耐都無位、咁耐都未上菜。我都唔想，做唔切呀！」除工資外，還要面對其他壓力，令經營愈見困難，她說︰「租金、人工、食材價錢都加，人手又唔夠，真係頂唔順！」餐廳將於本月底結業，現正另覓較細的舖位重新開業，她打算縮減餐廳規模，減輕人手與租金的負擔。

擴充無人手新店慘納空租

元朗薪意燒烤專門店店主：「最低工資令我請唔到店務員要停業。」

聘請職位：店務員

平均時薪：33至40元

「以前六千蚊請洗碗打崩頭爭住做，最低工資後，登廣告出到一萬蚊請店務員，打電話嚟問嘅人就多，真係見工嘅，十個有兩個都偷笑啦！」在元朗開業六年，上年於附近開分店的薪意燒烤專門店負責人賴先生表示，因請不到店務員，新店上月開始停業，至今一個月，「白交租，好彩租金係一萬蚊，仲捱得住。」

做看更坐喺度逗萬元

請不到店務員，難道條件太苛刻？「我啲長工起薪點係九千至一萬蚊，都係負責收錢，幫手燒串燒，做十個鐘，有半個鐘食飯，有時無客仲可以休息。」賴先生稱，條件其實不錯，洗碗等工作更由他負責，「收舖後店員可以收工，啲碗我自己洗，都要洗兩個鐘。」但見工嘅人卻怕辛苦，他說：「唉，最低工資實施後，依家做看更，剩係坐喺度都有成萬蚊，我呢份工要企，啲人咪話辛苦囉，我已經來者不拒但都無用，有工無人做係政府搞出嚟嘅！」

賴先生未做老闆前，由侍應做起，之後賣過牛雜，六年前創業，捱過金融海嘯，豈料生意卻因最低工資而受創，新店停業一個月復業無期，「未有執笠打算，見步行步，希望盡快請到合適嘅工人。」