CULTURE o翕：80發皮氣

今次我們找來兩位80後Edith和Ken，分享對hand-made皮革製品的看法。

走到商店林立的尖沙咀，不論是櫥窗模特兒身上的新季服裝，抑或那個價值不菲的名牌手袋，幾乎都設計相似，風格一致，在它們身上找不到濃濃的人味。對一班80後而言，這些商店的貨品，如千篇一律的「例牌服飾」，已不能滿足他們的需要。他們寧願花更多時間和金錢，以hand-made方法，按個人生活獨特需要，製作獨一無二的皮革用品，如散紙包、卡片套及手袋等，他們透過親手製作，體驗自我價值，把人氣和心意注入物件，凸顯個人風格。

Edith：那份濃濃的人味，係買唔到嘅。

兩年前，Edith被朋友問：「有無興趣一齊學整hand-made皮革？」誰知一試便愛上，自此Edith成為hand-made皮革的「粉絲」，至今已製作十九件皮革作品。她一直堅持hand-made，只因一份「人味」。「呢個物質社會，好多嘢都係mass production，人有我有，一式一樣，有咩意義？反而親自落手落腳去做，件嘢先有個人特色，有人氣。」

每次望見自己的作品，都會令Edith回想起難忘的製作過程。皮革製品的物料一般是用牛皮，既厚又硬，製作時間因作品大小而異，就如一個細細的散紙包至少也要花上四小時。「有次整一個斜孭袋，唔小心鎅傷隻手指，去到診所洗傷口，先知道鎅得好深，最後縫咗六針！」對Edith而言，每件製品都是有血有汗，正是hand-made的可貴之處。

Ken：自己親手整，一定啱心水﹗

另一位年輕人Ken，亦在一年前愛上hand-made皮革製作。本身修讀室內設計的他，經常要攜帶oversize設計圖，卻一直找不到合心意的「書包」，於是親手「度身訂造」一個巨型單孭袋。「hand-made可以按自己實際需要去做，夠實用，又有個人特色，令我好有滿足感！」之後，Ken還做了一個散紙包和錢包，「自己最清楚自己需要，呢個係hand-made最大嘅樂趣！」

另外，Edith還會根據好友的不同需要或喜好，親手製作皮革用品送給他們。「有個朋友因為工作需要，經常要拎住部notebook四圍去，但市面搵唔到佢鍾意嘅綠色notebook套賣，於是我親手整咗個畀佢。」買不到的，不止是綠色的notebook套，還有那份無價的心意和珍貴的友情。

有古講：狩獵進化工藝

皮革工藝源自古時的狩獵活動。原始人狩獵動物後，剩餘的毛皮就用以遮蔽身體及取暖，但存放太久毛皮腐爛。古代的西伯萊人於是想出將毛皮曬乾，再以石頭敲擊，令皮變軟，成為適合人類使用的皮革雛形，這種技術後來被人稱為「鞣革技術」。

專家說：獨創先有價值

同是80後的Alvin，去年辭去正職，開設workshop教授hand-made皮革，可謂見證着這個文化興起。他表示本港一向不注重工藝，但隨着部分工藝開始式微或失傳，令hand-made文化再次流行，近年不少學生更是80、90後。他認為hand-made潮流是社會物質氾濫的反彈。「年輕人較自我，不喜歡『人有我有』，喺呢個物質主義行先嘅大環境，佢哋寧願創作獨一無二嘅嘢，覺得咁樣先至有價值。」