政壇：搞搞政：田家兄弟選特首 向左走向右走

萬眾矚目嘅特首選舉今日舉行，有票在手嘅選委及所屬團體紛紛開會，尋日新民黨都公布咗佢哋嘅投票決定，副主席田北辰被人問到佢支持梁振英嘅話，咪同阿哥田北俊一個向左走，一個向右走？佢聽完後好不以為然，強調兄弟都可以有唔同政見啫，主席葉劉淑儀更幫口話，李國寶同李國章兩兄弟都有唔同支持對象啦。

呢場選舉罕有咁激烈，由提名到近日形勢逆轉、仍死撐唐英年或投白票嘅田北俊一直冇鬆口，話之民調邊個高啲。細佬田北辰就一直好着重民調，早前已經話要睇候選人嘅民意調查，觀察佢哋嘅支持度先作決定，又話冇理由揀一個民調低嘅人，尋日新民黨卒之有決定，田北辰亦自爆有人打過電話畀佢，游說佢今日投白票，不過，田北辰否認呢個人就係佢阿哥。

曾經入過自由黨、同阿哥田北俊政治立場相近嘅田北辰今次支持梁振英，會唔會同阿哥喺政治路上漸行漸遠？佢就即刻反駁話，兄弟都可以有唔同選擇啫。又係嘅，喺特首選舉一事上，李家同田家兄弟嘅選擇真係倒模咁相似。