政壇：民主阿婆李漢奸借投票抽水

每逢香港有大事發生，「民主阿婆」陳方安生同自稱要「日日做漢奸」嘅李柱銘都不甘寂寞。港大特首全民投票延長到尋日舉行，港島區開多咗幾個票站，但居於港島區嘅民主阿婆同李漢奸有近嘅票站唔去，反而去最多傳媒聚集嘅理工大學投票，之後民主阿婆又去中環參加反對中央干預特首選舉嘅遊行。

民主阿婆同李漢奸尋日喺理工票站一唱一和，話即使網上投到票，佢都會選擇用啲古老方法到票站投實票。其實固定票站只為方便一啲唔識上網嘅老人家，既然網上投票系統都整番好，兩老仲咁堅持唔肯用電子投票，究竟係唔識上網、食古不化吖，定係不甘寂寞想傳媒扑佢哋咪，企圖抽政治油水呢？咁就真係不得而知喇！

不過，諗諗吓如果民主阿婆唔去理大投票，又點通知各大傳媒佢下午會去中環遮打花園參加遊行吖！但今次民主阿婆遊行又係一如既往半途而廢做逃兵，並無行到終點中聯辦，究竟佢係禁足西環，定係又趕去恤髮呢？唉，其實都做得阿婆啦，舟車勞頓只為傳媒咪牌一扑，咁又何苦呢？