政壇：唐唐倒自己米

特首選舉今投票，喺競選期間先後多次失言嘅候選人唐英年尋日趁最後機會拉票，點知卻小丑上身，開口夾着脷，將「投票站」講錯為「投票箱」，之後又長他人志氣滅自己威風，衝口而出講咗對手梁振英（CY）競選口號中「齊心」兩個字，仲懵然不知。臨尾拉客都可以企錯位，梁營真係多謝佢咯！

叫選委入「投票箱」投票

民望大落後嘅唐唐尋日中午時分喺佢嘅灣仔競選辦樓下舉行記者會，佢初時講嘢似播帶咁，講到投票安排嘅安全問題時，佢即時露底話「每一個選委都可以入到投票箱憑良心投票」，選委可以縮小到「投票箱」投票，唔好講笑啦。

既然係娛樂大家，唐唐總係一不離二，講到幾日前聽到對手攞七百票，指摘人哋動搖唐營軍心時，唐唐大力反駁，仲話接觸自己嘅支持者之後發覺大家非常「齊心」，堅定不移咁支持佢，「齊心」好似係對手CY嘅競選口號喎，唐唐係幫人助選，定為自己選情「倒米」呢？

自去年九月底，唐唐辭去政務司司長開始「備選」特首後，非但未能有效展開競選工程，亦未能將自己同現屆政府嘅施政失誤切割，反而貫穿選戰嘅，係多次失言及連串醜聞接連爆發，最為人熟悉嘅係以「挖深咗」回應佢大宅僭建醜聞，又自言「有膊頭，有腰骨」，但事件被踢爆後頓誠信盡失，仲要擺老婆上枱擋駕，真係自打嘴巴。

今日特首選舉花落誰家，相信唐唐心中有數，究竟到時佢如何面對選舉結果，對佢嚟講都係一個重大考驗，如果萬一輸咗仲係亂噏廿四將責任歸咎對手，相信只會係繼續做小丑娛樂大家。