港府慢工出貴貨 沙中線淪金沙線

香港又有「奇迹」，搭火車竟然貴過上太空！唔係作古仔o架，嗱，港鐵沙中線最新造價近八百億港元，日本有間公司計劃建造連接太空站嘅「天梯」，七百八十億港元就搞掂，按平均每米造價計，沙中線要五百萬元，太空天梯廿二萬元有找，你話搭火車係咪貴過上太空吖！

港府話喎，受到通脹因素影響，沙中線工程最新預算由○九年嘅六百億元增至七百九十八億元。即係話，短短三年貴咗三成，咁仲唔係奇迹？講起真係無奈，每個港人平均要為呢條只有十七公里長嘅新鐵路付出一萬元，唔怪得有人揶揄沙中線係「金沙線」，真係冇講錯。

更離譜嘅係，當局居然要向港鐵支付百分之十點五嘅所謂「監工費」，大拿拿超過八十億元，簡直係慷納稅人之慨。立法會議員狂鬧港鐵「賺到盡」，只顧喺沿線各站加開店舖賺大錢，服務質素就每況愈下，依家仲獅子開大口收取巨額「監工費」，貪得無厭。

港鐵狂掠水，港府就狂卸膊，運輸及房屋局局長鄭汝樺聲稱已盡量控制建造成本，但冇辦法控制通脹喎。叮！乜都推晒畀通脹，局長不如改姓賴吖，笨！

其實，沙中線造價之所以急升，通脹固然係主要原因，但如果唔係當局議而不決，決而不行，又點會貴成咁吖。沙中線前後講咗十幾廿年，港府○二年已將營辦權交畀當時嘅九鐵，點知拖呀拖，拖到依家仲未動工，成本有乜法子不急漲吖。唔講唔知，依家嘅造價比九鐵年代估算嘅三百幾億元，足足貴咗一倍有多，問你怕未。

講開又講，港府辦事拖拉，遷延時日，導致成本急增浪費公帑嘅惡例，又點只沙中線吖。煲呔曾講到天上有地下冇嘅十大基建，吹到佢就嚟執包袱走人，真正動工嘅只有南港島線鐵路、高速鐵路、港珠澳大橋、啟德發展計劃呢幾項，其餘依然無影無蹤。到十大基建全部落實嘅時候，成本唔知又要增加幾多，呢啲咪叫成事不足，敗事有餘，倒錢落海囉。

人比人，激死人，人哋就話慢工出細貨啫，而特衰政府就慢工出貴貨，香港納稅人真係無辜。計太一叮話齋，如果繼續畀呢班廢柴庸官主政，香港唔止隨時淪為中國二、三流城市，甚至可能打回原形變番小漁村都似，叮！