City Parade：衣香．「檳」影
春意盎然的季節，MOISELLE綻放夏日寫意風華。早前喺會展舉行時裝騷，城中愛美之人齊撐場。今季起革命，放下工整精準裁剪，大玩幾何線條及印花圖案，釋放自由奔放美。另一邊廂，匯聚亞洲當紅電影人嘅「第六屆亞洲電影大獎」，亦喺會展上演。知名香檳品牌酩悅香檳，廣邀明星嘉賓喺一樽三公升特別版香檳上簽名，作慈善拍賣用途。
春意滿場
MOISELLE時裝舞台上，洋溢春意。
好友撐場
MOISELLE太子爺陳柏熹(右二)擔大旗搞時裝騷，好友曾昭怡(左一)、賭王千金何超盈(左二)及嚴紀雯(右一)齊打氣。
貴賓駕到
恒生新抱兼Zensation Beaute行政總裁何倍倩（左）到賀，MOISELLE老闆陳欽杰（右）及太太徐巧嬌（中）親自招呼。
畫出環保
專資會理事楊素珊本月底喺上海搞環保畫展。
緊貼潮流
名媛方劉小梅趁換季，添置唔少新裝。
老友同行
王賢誌（左）與譚鎮國（右）都係東華總理，當然老友鬼鬼。
留名行善
名模Cara G喺香檳上留名，見證慶典精彩一刻。
演技精湛
影后葉德嫻憑精湛演技頻頻得獎，風騷得有道理。
飲得杯落
著名音樂人金培達近年紅爆中港，當然飲得杯落。