政壇：搞搞政：做埋六月唔玩？光哥罕有歎長假

偷得浮生半日閒，呢句話對保安局局長李少光嚟講真係久違咗。尋日政府憲報宣布保安局副局長黎棟國近日好唔得閒，事關佢要兩度署任光哥嘅局長職務，好少喺大假期攞假嘅光哥今次一反常態，由三十一日起放假到下月六日，如果計埋復活節嗰三日紅假，光哥今次可以放最少十日假，打高爾夫、歎咖啡都優哉游哉喇。

光哥放假點解咁矚目？件事要由○八年泰國包機事件講起，當時光哥去咗日本公幹，保安局無人擔大旗，被指阻慢咗救援行動，無論係滯留泰國嘅港人定係一般市民都好㷫，保安局亦因而孭晒鑊。自此光哥好似變咗驚弓之鳥咁，大時大節更加唔敢放大假，就算後期有黎棟國擔任副局長，佢都只係敢放三至四日大假，去內地打吓高爾夫球輕鬆吓，即使真係有乜突發事情，佢都可以及時趕返香港主持大局。

夕陽政府任期六月就完結，政圈已有傳光哥做埋今屆便會功成身退，唔知係咪咁，光哥今次放假亦零舍有官場風向作用。話時話，黎棟國上次處理菲律賓人質事件贏盡口碑，光哥放假都應該安心好多。