政壇：史泰祖搶閘表態挺CY
醫學會尋日宣布十五個特首選委全部投畀特首候選人梁振英（CY），當中包括皮膚科醫生兼新民黨副主席史泰祖。其實，新民黨今朝先決定黨內六張選委票嘅投票意向，但史泰祖尋日已搶先表態挺梁，莫非佢獲新民黨豁免可以自由投票？佢笑笑口話，醫學界做得業界調查，佢就要跟結果投票！
史泰祖又話，如果選舉真係流選，新民黨一定會全力支持黨主席葉劉淑儀參選特首。對於有傳梁營早前向葉劉招手，想佢重返官場擔任政務司司長（CS），史泰祖就話要待該黨開會後先可以決定，但佢就舉腳贊成葉劉出任CS，仲話以葉劉嘅能力同民望都勝任有餘喎。嘩，講到咁明，唔知史泰祖係咪認為葉劉做咗CS後，九月立法會選舉港島個位就可以由佢披甲上陣呢？