香江和珅禮義廉 尚方寶劍可除奸

網民幫廉政公署改花名叫「廉政私處」，意思係睇死廉署對「香港第一貪」曾蔭權冇符，捉唔到大老虎，反而變成大貪巨腐逍遙法外嘅私人避難所。

煲呔曾貪盡海陸空，正牌禮義廉，萬一廉署真係自廢武功，仲有邊個可以降魔伏妖呢？有，就係立法會！

立法會有件鎮山之寶，叫做特權法，有權傳召任何人出席聆訊，亦可以索取港府機密資料，作用就好似一把尚方寶劍，既可上斬昏君，亦可下斬佞臣。嗱，立法會將會動議引用特權法徹查貪曾醜聞，呢個可以話係揭破醜陋「曾相」嘅絕地一擊。

查貪曾，點解一定要用特權法？一來政客狡詐，特首候選人唐英年冇證冇據之下，都可以亂噏「廿三」抹黑對手梁振英。煲呔曾為求洗脫貪腐罪名，更加可以生安白造多幾份「無字守則」出嚟狡辯。特權法有權索取政府內部文件，白紙黑字為證，貪曾就冇得砌詞抵賴。

二來咯喎，貪曾醜聞情節繁多，黐飲黐食黐大屋唔在講，最近又被環保組織踢爆，佢同煙草公司老闆何柱國來往甚密，已經牴觸政府官員不應接受煙草商款待嘅條文。貪曾醜聞材料之多簡直可以輯錄成一本《現代和珅傳奇》，如果不以特權法徹查，又點能夠抽絲剝繭，將整個貪腐集團連根拔起？

呢嗱，議員隨手都可以列出貪曾醜聞嘅十大疑團，好似煲呔曾接受咗邊個富豪款待？同行人士仲有乜水？外遊食宿邊個畀錢？等等等等。咦，若然案情大白，等啲公公婆婆都問「曾朋友」富豪黐番轉私人飛機、遊輪歎吓先，不過老人家唔係畀「市價」，去日本又好，去泰國又好，票價都係兩蚊雞咋！

講到呢度，呢條益街坊嘅黐飲黐食黐外遊大計有冇機會實現呢？咁就要睇班保皇黨嘞。立法會表決引用特權法查貪曾，牽涉本港廉潔文化嘅核心價值能否維持。就連公務員都話要上立法會討論貪曾醜聞對公僕士氣嘅影響，如果保皇政客與民為敵，放生貪曾，小心市民用腳倒曾之餘，亦用選票趕走你哋！

咁講啦，受民錢財，替民消災，各位保皇議員，人工你哋識加，係咪都好應該幫納稅人消災解難，剷除煲呔曾呢隻社會公害呢？

貪曾罪尤太昭彰，擎起寶劍斬群妖。立法會唔應該淪為真正嘅「廉政私處」，保皇黨小心投票呀，全港市民睇實你哋㗎，叮！