政壇：搞搞政：飯局了恩仇 孱仔強向CY示好
梁振英（CY）競選辦要員上月出席流浮山鄉事選委飯局，席間又有江湖人士出席，事後疑似中伏畀唐營狂砌同「黑金政治」有關，搞到梁振英競選辦事後都要忙於解畫，其中有份出席飯局嘅梁振英支持者、全國政協委員劉夢熊曾表示，鄉議局副主席「孱仔強」林偉強有份安排該飯局，但孱仔強當時矢口否認，又話有人轉移視線，日日有唔同版本。
不過，正所謂「政治一日都嫌長」，事後有鄉紳終於主動承認有份做「中間人」約飯局，孱仔強尋日被問及此事會否影響鄉事派和梁振英的關係時，亦都冇再好似之前咁講到硬繃繃，反而主動伸出友誼之手話事件已過去，彼此已經冰釋前嫌，將來大有合作空間，又話選舉前好多真真假假、是是非非，希望唔好太介懷喎。究竟孱仔強想同梁營做朋友係一廂情願，定係兩情相悅？大家就要拭目以待喇！
設計圖片及對白