政壇：認股權切餅純官最大份
新世界發展新任主席鄭家純近期喜事重重，一個月內榮升主席，又做埋岳父，尋日公司送咗一批認股權證畀一班高層，鄭家純嗰份最大，阿仔鄭志剛同埋新婚嘅鄭志雯都有份。
佢哋總共向一眾包括高層在內嘅員工授出總數達到1.073億份購股權，每份行使價為9.77元，當中2,700萬份係畀董事級嘅高層。呢批權證點分呢？當然係最大粒嘅佔多啲，鄭家純作為主席兼執董，就有1,000萬份，其他鄭氏家族成員包括鄭志剛、鄭志恒及鄭志雯就分別有350萬、50萬及300萬份，個title同鄭志剛一樣（執董兼聯席總經理）嘅陳觀展，都係有350萬份，至於執董紀文鳳就有300萬份。
鄭家純（右）同鄭志剛獲批認股權證。