政壇：惡搞唐唐漫畫成中學教材
特首候選人唐唐夫婦喺九龍塘約道大宅僭建地牢醜聞，連學校都用嚟做反面教材。日前網上流傳一份中學嘅英文習作，竟然用咗網民惡搞唐唐嘅漫畫，要求學生回答漫畫中人係邊個。做習作嗰位中五學生就答話，係今年特首候選人「Henry Tang」（唐唐洋名）同「Mrs Tang」（唐太），真係醜事傳千里，連學生哥都知佢哋嘅醜行。
唐唐被踢爆僭建「地下行宮」之後，創意無限嘅網民創作咗唔少惡搞唐唐嘅漫畫。其中一張就係唐唐喺地下酒窖歎紅酒，唐太郭妤淺喺酒窖上面嘅泳池暢泳。畫中嘅唐唐喺酒窖天窗見到老婆時，當堂噴出紅色液體，唔知係噴紅酒定嚇到噴血。