稅務大樓已淪陷 大小老鼠亂香江

過街老鼠，人人喊打。點解宵小鼠輩注定係人類天敵呢？第一，佢哋污糟邋遢，人見人憎；第二，貪食饕餮，威脅社稷；第三，散播毒菌，危害人類，所以人人得而誅之！咦，撞鬼咯，乜好似講緊曾蔭權咁嘅！

冇錯，煲呔曾真係愈睇愈似一隻人形老鼠。嗱，佢喺特首選舉陰濕搞局，暗扶唐英年，偷襲梁振英，手段夠晒污糟邋遢；傍住富豪黐飲黐食黐大屋，曾商勾結嘅貪腐嘴臉醜陋不堪。更恐怖嘅係，貪曾病毒蔓延港府，高官收禮無王管，香港廉潔根基被蠶食。所以話，「曾鼠」為患，真係禍害無窮！

即係咁，港府由鼠輩之流打骰七年，唔使多講，結果就係香港沉淪，後遺症一大籮。其中一個後遺症正正就係養鼠為患，政府嘅辦公大樓淪為藏污納垢嘅鼠竇，唔通呢啲就叫物以類聚？

「皇家鼠竇」喺邊？咪灣仔稅務大樓囉。講起就核突咯，稅務局職員斗室工作，鼠王鼠后就喺天花板開派對，舉頭三尺有老鼠，點到你唔驚？鼠輩橫行，小強一樣無處不在，攞起電話，佢哋會出嚟同你打招呼；打開櫃門，佢哋就奔跑四散，咦……諗起都打冷震。

雖然大家成日批評，港府施政鼠目寸光，但政府部門變蟲鼠樂園，實在匪夷所思。稅務局員工懷疑，上年底稅務大樓附近食肆裝修，所以老鼠搬大屋，攻陷稅務局。政府產業署就話，承辦商正進行滅鼠行動。

嗱嗱嗱，港產官僚做嘢一向敷衍塞責，但家陣稅務同僚伴鼠如伴虎，你哋做嘢要爽手啲嘞。公僕返工提心吊膽，部門效率肯定受影響，最驚仲係香港變咗衞生惡劣嘅第三世界，甚至搞到病菌四圍走，灣仔出現第二個「病菌總部」，咁就大件事！

話時話，港府成日叫市民預防鼠患，偏偏政府部門係蟲鼠天堂，講落都幾樣衰。正如職責係肅貪倡廉嘅廉政公署阿頭，居然被踢爆係貪曾醜聞富豪嘅高球波友，你話幾諷刺呢！

唉，物以類聚，鼠以群分。煲呔曾貪腐醜聞曝光之際，庫房帳房驚變蟲鼠大本營，唔通有靈異啟示？咪嘞，鼠患呢家嘢可大可小，既要治標，更要治本，稅務大樓嘅老鼠要除，煲呔曾呢隻人形污鼠更加要掃走佢，叮！