政壇：政商定格：王賢訊冰室打躉寫小說
身兼仁濟醫院總理嘅王氏電子第三代後人Vincent王賢訊，遲啲仲會進身作家行列。佢本新書叫《輔命師》，係借用一位已故國家領導人當年打江山嘅歷史背景，虛構一名喺背後幫該領導人完成大業嘅術數高人賴杰，新書將於七月喺書展同書迷見面。
Vincent對風水術數好有興趣，曾研究過有關國家領導人嘅八字，所以發揮天馬行空嘅創意，構思咗呢個古仔。沉醉於寫小說嘅才子、才女，總喜歡喺咖啡室度橋，原來佢都唔例外，閒時經常去尖沙咀香檳大廈地庫嘅星座冰室，歎至愛嘅番茄腸公仔麵。佢話好鍾意嗰度充滿老香港嘅感覺，有時靈感一到，會即時用手機寫小說添！
王賢訊幫襯星座冰室多年，邊食邊諗寫小說嘅靈感。