政壇：搞搞政：選舉通知文句艱深 譚志源認衰

九月立法會選舉新增五個超級區議會議席，三百多萬地區直選嘅選民「一人兩票」，自動成為超級議席嘅選民，選舉事務處已發信通知選民新嘅安排。但建仔嘅立法會議員尋日喺相關事務委員會直指信件嘅內容文句不通，相當難明，即使佢早已知道信中內容，但都要花啲時間去咀嚼信內嗰啲「又否定、又肯定」，普通市民分分鐘會睇到一頭煙，唔明點解政府唔可以用啲「通俗」嘅文字宣傳。

之前亦有市民投訴過相關嘅情況，睇怕政制及內地事務局局長譚志源都收到風，聽到議員咁講，即刻認衰，話理解有時政府信件嘅法律性會係多啲，令一般市民較難明白，而喺嚟緊嘅選民登記運動中，局方會用番啲淺白嘅文字去宣傳。

人民力量嘅議員黃毓民就繼續追問局方自動為選民登記嘅理據，問到連譚志源都冇時間答，於是委員會主席就同毓民講：「依家係局長主場。」叫毓民畀譚志源答咗先。