政壇：唐唐掘井泛民抽水

上周五舉行嘅特首選舉候選人辯論，唐唐突然兩度爆出「政府高層會議」內容插對手CY梁振英。唐唐一方面拋出「深水炸彈」絕地反擊，被外間認定「黔驢技窮」才出此下策，企圖同CY玉石俱焚，但另一方面就等同掘井，畀泛民主派喺咁抽水。

唐唐無的放矢後，被視為「唐營B隊」嘅白鴿黨鐵頭仁如獲至寶，派出該黨代理主席劉慧卿做「排頭兵」出手，要求政府就「防暴隊論」表態解釋。另一邊廂，工黨主席李卓人領導亦正式走出台前同「唐英年B隊」大合唱，以公眾知情權凌駕保密制為由，計劃喺明日動用立法會「尚方寶劍」特權法，要求當局公開行會嘅相關機密資料。至此看來，一直隱藏嘅「唐營C隊」正式曝光。

就連因港珠澳大橋及外傭爭居港權事件而民望插水嘅公文袋，亦好似久旱逢甘露咁，佢哋嘅黨魁袋巾傑仲大大聲話唐唐嘅做法係擲地有聲，公眾利益係凌駕保密制嘅。

大家都知道，行政會議討論涉及大量敏感資料，所以內容要保密，不能隨便公開，況且唔少前高官已經講明行會無逐字會議紀錄，所以話要公開紀錄只係「抽水」居多。

弱勢政府有利選舉翻身

有心水清嘅政界中人，對再有泛民中人獻身成「唐營N隊」不感意外，因為泛民對醜聞纏身嘅唐唐上場情有獨鍾，由佢領導嘅弱勢政府只會向泛民提供源源不絕嘅攻擊彈藥，絕對有利喺九月立法會選舉大翻身，彌補去年區議會選舉嘅失利，所以一有機會佢哋就向唐唐主動獻身。話時話，唐唐同泛民「眉來眼去」，如果唐唐繼續玩嘢畀機會泛民做騷撈取政治本錢，最終只會玩火自焚。