洩密損人不利己 唐唐攬住一齊死

叮！又話係君子之爭，因乜事幹特首選戰搞到愈來愈一塌糊塗o架！有一位電台聽眾講得非常之咁精闢，家陣係選特首，唔係選八婆呀！

唔知大家點睇，太一叮就覺得三號候選佳麗唐英年好冇品囉。唐唐忽然之間喺選舉論壇大爆陰毒，指摘對手梁振英當年喺行政會議討論《基本法》二十三條立法，聲稱始終有一次要出動防暴警察以催淚彈對付示威者，又建議將商台牌照年期縮短，企圖打壓言論自由。

呢嗱，無論唐氏語錄孰真孰假，點都係冇品嘅表現。如果係假嘅，當然係無中生有含糞噴人啦，今次人格謀殺，下次容乜易先姦後殺o架。如果係真嘅，喂，行政會議唔係應該集體保密嘅咩？為咗一己榮辱居然利用洩密嚟攻擊對手，太一叮贈你一個字：賤！

唐唐話喎，由於事關公眾利益，所以凌駕保密要求，願意承擔一切後果。太一叮真係想問一問，行政會議討論嘅所有問題，有邊一樣唔係關乎公眾利益嘅呢？莫非討論範圍竟然包括感情缺失或者屋企掘窿？既然公眾利益可以凌駕保密要求，咁以後行政會議唔好閉門謝客咯，宅男宅女走出陽光底下，索性好似城市論壇咁喺維園公開研究治港政策吖，笨！

曾經做過行政會議成員嘅前高官王永平就話嘞，政府必須解釋行政會議保密制度是否仍然保留，如果答案係繼續維持，政府應該對於違反規定嘅人表示清晰立場，不贊成、不認同甚至批評。平叔仲話，政府對呢件事不評論係唔妥當嘅，令人認為處理上不公平，同處理西九事件有差別g。

做過保安局局長嘅新民黨主席葉劉淑儀都反對洩密行為，認為政府原則上要表態譴責洩密者，否則行政會議不能有效運作。

講真吖，唐唐洩密只係損人，根本毫不利己，因為民眾眼睛是雪亮的，冇人會支持一個攬住對方一齊死嘅「政壇人肉炸彈」。又係唐英年自己講嘅，唔好搞黑材料，比政綱，比理念，比經驗，到頭來講一套做一套，仍然係喪玩抹黑政治。所以話啫，七百萬冇權投票選特首嘅香港人確係好無奈，無論候選佳麗係幾咁醜聞纏身或者口沒遮攔，都冇辦法阻止鬧劇繼續獻世。家陣惟有求神拜佛，唔該一眾選委良心發現，千祈唔好揀一個勢必引發萬人空巷上街示威嘅籮底橙做特首呀，否則叮爆你一千二百個鎯鎯！