on.cc 東方互動主頁

SUN世代：鋰電大王 Power遍全球

二十三歲那年，梁昌明拿着父母給的二十萬元，隻身到內地開始其電池生產事業。那時手提電話仍是水壺般大小的大哥大，電子手帳亦僅推出了第一代。時間匆匆二十載，梁昌明手上不只有一枚小小電池，更掌控了全港最大的鋰電池王國，「全球五大電話品牌，都有用我哋出品嘅鋰電；全球每一個角落，都搵到我哋嘅產品。」

眼前的梁昌明，衣着新潮，看來比實際年齡年輕十歲，他笑言是要補償年輕時「未潮過」，「當時啱啱創業，為咗畀人感覺成熟可靠啲，成日都着得好老成，二十零歲就着到三、四十歲咁。」他的故事，要由年幼時說起。

梁昌明小時候就對數理科學情有獨鍾，愛把小電器拆開研究，更會到深水埗鴨寮街購買零件，砌礦石收音機，「由於對呢方面有興趣，大學時就揀讀電子工程。畢業後，我加入咗一間造電池嘅公司，專責研發電池。」

研發電池的工作，不但加深梁昌明對電池的認識，亦令他看到電池潛藏的無限商機，「當時去美國交流，發現當地嘅電池市場已經興起，有一定需求；相反亞洲市場仲喺起步階段，我就諗點解唔趁呢個時候發展，飲頭啖湯？」時機、技術兼備，資金成為他創業的最大障礙，家人此刻的支持，助他推倒眼前巨牆，「屋企家境唔算好，但原來父母辛辛苦苦儲咗二十萬，諗住我如果讀唔到香港嘅大學，就畀我去外國升學，當時佢哋就決定畀筆錢我創業。」

拆電池分析贏客人信任

萬事起頭難，梁昌明到內地遇到不少問題，「筆錢用嚟租地方、請工人之後，已經無乜淨，結果技術開發、研究、搵客，都要自己一腳踢。」資金不足，更令他無法參與業界展覽，需以「打游擊」方式接觸客人，「喺電子節呢類展覽擺檔，成本好高，我哋負擔唔到，惟有喺大公司嘅檔位附近等客人出現，再去sell佢哋，甚至會去客人住嘅酒店等，希望以誠意打動佢哋。」梁昌明的致勝法寶，是使出撒手鐧─拆開各款電話電池，分析它們不足之處，「我會將電池嘅結構畫出嚟，睇吓有咩改善地方，仲向客人承諾，用更低價錢，做出更好產品。」

經過近年半努力，梁昌明終獲首位客人信任，他亦把握機會贏得口碑，帶來更多生意。事業愈來愈成功，梁昌明積極研發及改良產品，「例如提高電池嘅電容，又或者喺零下四十度依然運作正常嘅電池。我哋啱啱仲喺日本推出電容極大嘅可攜式充電池，估計足為五百部智能電話充電！」他的電池王國還在不斷擴張。