政壇：兩大校長盃CU贏HKU

尋日舉行「兩大校長盃」，港大同中大嘅教職員打場友誼波，港大校長徐立之同中大署理校長黃乃正主持開球禮。徐校長話讀大學嗰時喺足球隊做過龍門同前鋒，今次齋睇真係腳痕痕。點解唔落場顯腳法？佢自嘲「人老咗，又冇練習」，膝頭有舊患，惟有做觀眾打吓氣。

最後中大主場三比零贏咗。捧足全場嘅徐校長話呢場係友誼波，唔理輸贏，最緊要踢得開心。有份踢嘅港大教授陳龍生講笑話，同事嘅腰圍同年齡都「優勝」對手，賽果係意料之中。黃乃正就話，場波一開始係紀念兩大學○三年共同對抗沙士，今年第十年，隆重其事仲加埋醒獅表演添！

港大學生會日前喺報章登廣告，質疑特首選舉涉黑金政治，徐校長重申，港大傳統係畀學生自主空間，但做事一定要守法，其他嘢校方唔會管。而登廣告係咪急進，無充分諮詢其他學生，佢話：「我無參與討論，亦唔知道事件背景，唔能夠批評佢哋嘅做法。」