政壇：曾唐爛兄爛弟

特首選戰發展至今，候選人CY梁振英不斷受到來自四方八面嘅攻擊，除要應付主要對手唐唐陣營嘅明槍暗箭外，仲要承受有「唐英年B隊」惡名嘅民主黨，同埋「唐英年C隊」特區政府無的放矢嘅謾罵同指控。堂堂政府淪落到做人哋啦啦隊，如果唔係煲呔曾授意，相信班官員都唔敢做得咁明目張膽。實際上，過去幾個月煲呔曾同唐唐相繼被爆大鑊，效果就好似互相掩護咁。

衰嘢輪住出

煲呔曾同唐唐嘅衰嘢，喺呢幾個月嚟真係互相「輝映」。特首選舉去到中段，唐唐被揭發大宅僭建，又畀我哋刊登咗疑似佢同一位女士來來往往嘅情慾電郵，喺全城鬧哄哄之際，東方報業集團又獨家揭發煲呔曾「貪盡海陸空」嘅醜事，結果又引起全城關注。煲呔曾變成過街老鼠，最終被迫去到立法會接受議員公審，當住七百萬港人面前道歉，但市民仍然唔收貨，早前仲引發幾千人上街齊齊打煲呔曾小人。

就喺煲呔曾走投無路之際，唐唐就不斷喺網頁撰文，行文仲要一改以往扮晒親切和諧嘅作風，一時鬧對手既狼且辣，一時叫人小心CY，總之就好似完全變咗兩個人咁，全港市民嘅焦點好多都轉移咗去佢身上，令煲呔曾可暫時鬆口氣。

唐唐早幾日喺電視辯論上以自殺式襲擊對手，務求做到玉石俱焚，自己唔贏都唔畀你勝出，呢啲咁陰騭嘅行為，令全香港嘩然，客觀效果又係令到全港市民暫時忘記煲呔曾做過啲乜嘢衰嘢，總之兩個人可以做到互相掩護嘅效果，佢哋唔係「爛兄爛弟」係乜先？

前日有電視台記者去到教堂門口等煲呔曾，見住佢笑容燦爛咁行出嚟時，竟然唔再追問佢涉嫌貪污呢單嘢，而係去問佢對於唐唐爆行會內容有乜睇法，其實煲呔曾貪盡海陸空，仲有好多嘢未回答。佢哋兩兄弟衰嘢輪住出，想話佢兩個唔係一樣咁爛都唔得。