隱瞞絕症禍香江 庸官亂噏當秘笈

食物及衞生局局長周一嶽撞板多過食飯，周一鑊嘅花名街知巷聞。唔講唔知，佢最近又多咗一個新朵，叫周一噏，周圍亂噏，噏得就噏咁解。

呢，東區醫院年初有位外科醫生跳樓自殺，最近先至被揭發死前感染愛滋病，搞到人心惶惶。點知周一嶽竟然「維穩」上身，聲稱雖然感染愛滋病嘅醫生死前冇申報，但大家唔使太擔心，因為香港通街都係愛滋病帶菌者，而根據專家委員會報告，醫生將病毒傳畀病人嘅風險好低，所以現階段唔使追蹤佢接觸過嘅病人喎。

叮佢個鎯鎯呀！愛滋病係世紀絕症，感染途徑包括性接觸、血液、體液同母嬰傳播等等。家陣一個感染愛滋病嘅外科醫生跳樓自殺，接觸過佢嘅病人、處理過佢屍體嘅警員、執屍隊同附近街坊點會唔擔心呢？周一嶽為咗卸責，竟然輕描淡寫，話愛滋病嘅傳播風險好低，簡直豈有此理！睇嚟，醫管局除咗調查今次事件，仲要派人驗吓周一嶽個腦，睇吓佢黐咗邊條線。

至於佢話香港通街都係愛滋病帶菌者咯喎，根本就係詛咒港人，抹黑香港。試諗吓，香港變咗「愛滋之都」，比「禽流之都」、「沙士之都」仲恐怖，邊個仲夠膽嚟香港旅遊消費啊？全民健康動力主席勞永樂炮轟周一嶽亂噏廿四，無法平息恐慌，反而製造另一場恐慌，真係鬧得啱。

不過，周一嶽孭鑊孭得多，已經練成幾尺厚嘅超級面皮，你有你鬧，佢就關人個關。尋日之嘛，佢居然走去出席一間私營醫務中心開幕禮，你話係咪不務正業吖。大家都知，自從煲呔曾傍住富豪黐飲黐食醜聞曝光以來，市民對官商勾結、利益輸送深惡痛絕，周一嶽仲不避瓜李之嫌走去出席私營醫務中心嘅畀面派對，擺明同民意作對啫。

再講吖，本港公共醫療問題多多，既然周一嶽咁得閒出席私營醫務中心開幕禮，點解唔花少少時間了解吓公院醫護人員嘅苦況？點解唔去關心吓醫護流失問題？

其實，夕陽政府時日無多，而周一嶽又劣迹斑斑難望連任，所以咪鋪定後路，準備轉投私家醫院搵真銀咯。前線醫生就講得啱啦，周一嶽七月隨時埋單，依家頻頻出席私營醫療機構活動，擺明係想泊定個好碼頭。

講到尾，周一嶽無嘢叻，最叻就係撞板闖禍同埋卸膊卸責，佢可以搞到公營醫療千瘡百孔，同樣可以搞到私營醫療一塌糊塗，太一叮忠告各私家醫院帶眼識人，小心「引鑊入室」啊，叮！