政壇：搞搞政：張學潤嫌辯論戰衣老土

三個特首候選人梁振英（CY）、唐唐同鐵頭仁前晚首次同場辯論，全城關注，由於辯論時間正處晚上閤家歡嘅黃金時段，唔少人關注佢哋喺擂台上嘅辯才外，都對三人各方面評頭品足一番，著名形象指導張學潤（Nelson）就話，三人揀嘅西裝太普通，條呔顏色又唔靚，好老土！

其實，日前嘅辯論三個候選人都戴上鮮色呔，CY以其競選辦主調嘅橙色呔配白色恤衫，唐唐就打紅色呔配淺藍色恤衫，鐵頭仁則戴上紅色斜間呔。但Nelson話，鮮色呔唔係人人都可以carry（駕馭）到，唐唐着藍色恤衫，雖然睇起上嚟較為摩登，但可惜畀條紅色呔拖累晒。至於鐵頭仁條呔，簡直好似幾廿年前啲款式咁，想復古反變老土。除咗條呔，Nelson仲對佢哋揀嘅西裝有不滿。

不過，政界中人衣着一向保守，若三個候選人着到花喱碌嚟打擂台，驚嚇度同娛樂性雖然大增，但可能因潮失票都未定。