政壇：曾鈺成暗撐流選執死雞

國務院總理溫家寶日前談及香港特首選舉時強調要堅持公開、公正、公平同嚴格依法辦事，必可選出一個「為多數港人所擁護的特首」，說話引起各方解讀，有人藉此曲線挺心水人選。曾講過會喺流選後參選嘅立法會主席曾鈺成，尋日又出嚟解讀領導人嘅意思，話「流選」都係依法辦事，莫非佢想借領導人把口鼓吹流選，等自己有機會執死雞參選？

曾鈺成尋日喺電台節目度話，領導人講嘢粒粒字都秤過，例不虛發，所以解讀要全面，唔可以睇啲唔睇啲喎。佢嘅解讀係中央對選舉嘅兩大前設係堅持「公開、公正、公平」，即係唔准搞陰謀詭計，要光明正大；同埋唔好畀個人利益、偏見私利蒙蔽，要顧全大局。

曾鈺成陰陰嘴嘅分析係，特首候選人要攞到六百零一票至有資格做特首，否則六個禮拜後就要重選，呢個機制係去年經過立法規定嘅，所以佢理解流選都冇不符溫總口中所講嘅「法律程序」，叫大家唔使擔心流選即係違法喎。佢跟住又話唔贊同選委動員其他人去投白票，因為咁樣等同鼓吹流選，但另一方面又話投白票唔係乜嘢大問題，講得自相矛盾，仲畀人感覺佢對流選樂見其成添，話晒流選嘅話，佢講到明要參選o架嘛。