政壇：7.1官場啟示錄

特首選舉六日後投票，結果已呼之欲出，近日官場頻見異動，政圈亦有唔少梁營班底嘅風吹草動，對七月一號後司局長何去何從都有啲啟示。尋日特首候選人梁振英（CY）舉行記者會，反擊爆行會資料指控佢嘅唐唐，同佢一齊露面嘅仲有好耐冇高調現身嘅前教育統籌局局長李國章，唔通新政府嘅熱廚房將有李國章加入？另一邊廂，早前已傳出有意離開政府嘅運輸及房屋局局長鄭汝樺（Eva）就講得模棱兩可，話七一會唔會留任要問過屋企人喎！

醫療教育皆能勝任

李國章尋日同CY一齊舉行記者會，仲以○三年行政會議成員嘅身份講出佢唔記得CY曾經講過畀唐唐指控嘅話。李做過中大校長，又係前高官，佢為CY背書，對拆解唐唐爆陰毒有好正面嘅作用。尋日李國章發言時不時同CY眼睛交流，互動多多，似乎好有默契，本身亦係CY提名人嘅佢今次咁勇，有人解讀可能會喺新一屆政府中重任要職。

睇番現屆政府，教育局局長孫明揚患有嚴重腎衰竭，話到明七一肯定退，李國章尋日都話佢做過教育，本身係醫療界中人，換言之，入政府無論做醫療定教育都冇問題？

至於過去一直有傳唔想留任下屆政府嘅Eva，尋日出席一個電台節目講到會否留任下屆政府，佢就話人生一定有唔同嘅階段，但同乜嘢人合作、做乜嘢崗位都係次要，最重要嘅考慮係睇吓家人有乜意願喎。佢話自己服務市民近三十年，往後點發展，呢個係人生嘅鋪排問題，強調好清楚自己想要啲乜嘢，而未來路向一定要同家人有共識。咁講，即係家庭為重啦，同高官例牌話服務市民嘅口脗好唔同，睇嚟佢嘅離意有多冇少。