貪官醜聞停不了 曾商勾結知多少

「莫伸手，伸手必被捉。」被封為「香港第一貪」嘅煲呔曾以權謀私、大小通吃，自以為可以瞞天過海，點知醜聞愈揭愈多，愈揭愈臭。叮，呢啲就叫做「若要人不知，除非己莫為」，貪官偷食唔抹嘴，遲早必被捉嘅咋！

東方報業早前獨家踢爆煲呔曾今年二月坐富商私人遊艇「豪遊澳門」，而且出席賭場春茗，同三山五嶽人物把酒言歡。話口未完又多一單，原來貪曾傍住富商黐飲黐食早有前科，舊年四月亦曾到澳門「休假」三日兩夜，同行者亦係同一班富商，包括劉鑾鴻等人，仲大模廝樣、連群結隊參觀一間就快開幕嘅新賭場添。

本來呢，煲呔曾貪威識食，大家早就見怪不怪，奇就奇在佢舊年四月過澳門「休假」，同今年二月豪遊澳門一樣，都冇刊登《憲報》。特首辦被傳媒追問先至承認確有其事，仲強調佢冇參與賭博喎。老實講，佢有冇參與賭博邊個知吖。

話時話，平時煲呔曾就算即日來回嘅短途行程，都會刊憲，甚至要搵其他官員署任，偏偏同呢班富商結伴遊澳門就神神秘秘，偷偷地去，悄悄地回，如果話當中冇蠱惑，你信唔信吖？正所謂，身正唔怕影斜，如果佢行得正企得正，又使乜咁鬼祟吖？正如有人話齋，呢啲醜聞可能仲係冰山一角嘅咋！

煲呔曾唔好唔記得，佢係香港特首，唔係澳門特首，成日踩過界，傍住呢班富商去澳門究竟意欲何為呢？佢亦唔好唔記得，本港社會、經濟、民生問題一大堆，佢既然有咁多時間過澳門「休假」，點解唔花少少時間關心吓本港孤苦伶仃嘅老人家，探訪吓住喺劏房嘅基層市民？仲有吖，佢咁有興趣參觀澳門賭場建設，點解又唔去了解吓西九及啟德發展呢？

更唔尋常嘅係，煲呔曾前排喺立法會接受議員質詢時，聲稱同款待佢飲飲食食嘅富商劉鑾鴻等人只係「一般朋友」。但事實係，佢黐飲黐食黐遊艇甚至黐飛機，嚟嚟去去都係呢幾個人，咁都叫做「一般朋友」？就算係一般朋友，都洗唔甩官商勾結嘅嫌疑喇！

難為貪曾自認係曾子後人，其實曾子一生甘於貧困，從來唔會傍住富商黐飲黐食，唔似得煲呔曾大小通吃，連跑步機、肥雞菜心都唔放過。即係咁，如果曾子真係有咁嘅後人，可能要學老師孔子嘆一句，「吾不欲觀之矣」。計太一叮話齋，煲呔曾無謂再丟曾子架喇，不如跟和珅姓罷喇，叮！