政壇：搞搞政：電子傳媒趕絕行家

特首選舉備受關注，傳媒嘅監察踢爆咗呢場選舉同政界中人有幾咁醜陋，十一間電子傳媒準備明日搞場特首候選人論壇，本來係件好事，但電子傳媒作為傳媒一分子，竟對媒體自己友處處設限，搞到文字傳媒報道受限制，甚至只能喺電視機旁作非現場報道，咁樣點維護香港嘅核心利益呀﹖

十一間電子傳媒尋日向文字媒體設下最新限制，稱因場地所限，文字記者只能喺隔離房睇直播，連攝影記者都唔係全部可以喺現場拍攝，只能由一間做代表，影完分發畀其他文字媒體。經過一輪諮詢後，除咗本集團外，其他報紙都話不必抽籤搵代表，認為由一個攝影記者團體影咗發相就得嘞。

舊年國務院副總理李克強訪港時，政府新聞處對傳媒處處設限，當時電子傳媒同文字媒體無一唔鬧爆夕陽政府嘅做法，反對由官媒發放材料，但依家事過境遷，電子傳媒自己有得做就算，懶理同樣履行緊天職嘅文字媒體，咁同自打嘴巴有乜分別？