政壇：梁卓偉麥靖宇中聯辦密會
特首辦常任秘書長麥靖宇早幾日現身西環中聯辦，原來係同中聯辦人員進行工作會面同開例會，不過，當時佢嘅神態都好鬼祟。事隔兩日，麥靖宇尋日再次坐政府座駕去中聯辦開會，今次仲有特首辦主任梁卓偉相伴，兩人喺中聯辦逗留接近一個鐘頭後才離開。
尋日朝早十一點半鐘，一架灰色嘅AM七人車直駛入中聯辦停車場，但由於車速太快，睇唔清車上有啲乜嘢人。四十五分鐘之後，謎底終於解開，原來車上嘅係麥靖宇同梁卓偉。梁卓偉發現有記者在場有少少愕然，但之後都有對住鏡頭笑，而麥靖宇就一貫木獨表情，不動聲色。
特首辦同上次一樣都係同一個回應，話特首辦同中聯辦不時都會進行工作會面或會議，而梁卓偉同麥靖宇尋日去中聯辦只係一般工作會面喎。
梁卓偉（右）發現記者後大方一笑，身旁嘅麥靖宇以木獨表情避開鏡頭。（周景文攝）