政壇：港交所加人工夏佳理無份

加人工之聲頻傳，尋日輪到港交所，雖然主席同非執行董事份人工係象徵式，但港交所下個月二十三號會舉行股東周年大會，將會動議加主席同非執董人工。主席「年薪」會由去年嘅五十五萬元，增加百分之六十三至九十萬元，非執董就由去年嘅三十八萬五千元，增加百分之五十五至六十萬元，換言之，夏佳理個位將有六成人工加，以加幅計真係跑贏萬千打工仔！可惜夏佳理任期將滿，只有羨慕下任囉！

除咗主席同非執董加薪外，港交所都會動議，向稽核委員會、常務委員會、投資顧問委員會同薪酬委員會嘅主席同成員，每次出席會議有三千元費用，較去年二千五百元，增加百分之二十。

港交所解釋，根據顧問公司嘅建議，港交所非執董需投放喺董事會工作嘅時間要比大部分恒指成分股公司為多，而且家吓港交所非執董酬金雖高於全部四十六家恒指成分股公司嘅中位數，但若相較於二○一○/一一年度，十大恒指成分股公司獨立非執董嘅平均酬金為八十九萬一千元，就仍有不及；亦遠低於十六家海外上市交易所非執董平均酬金嘅一百一十六萬元！