政壇：李國寶連任危危乎

特首選戰快將落幕，下一場政圈盛事就係第五屆立法會選舉，呢個選舉定於九月九號星期日上演。各大政黨早早部署之外，今年功能界別聽聞都好多人爭，我哋查過《通勝》，當日係舊曆七月二十四，同生肖屬兔嘅人相沖，嘩！立法會一眾屬兔而又想競逐連任嘅人咪蝕章？睇番議員出生資料，當冲者包括向有議會懶蛇稱號嘅金融界李國寶同其他八人，當中又以李國寶嘅勢最危，事關佢政績唔標青，今年對手又來勢洶洶，驚定先都啱o架喇。

大懶蛇三點不露

現屆立法會中共有九名議員屬兔，三九年出世嘅就有金融界李國寶同工程界何鍾泰。出名「三點不露」嘅李國寶喺立會一直表現麻麻，依家港區全國人大代表吳亮星更加話會積極考慮參選金融界功能組別，李國寶仲可唔可以霸住個位真係好難講。

睇番李國寶喺立法會嘅懶蛇歲月，佢自八五年擔任金融界功能組別議員至今，一路都唔捨得走，第二屆立會選舉係佢唯一受到挑戰嘅一屆。當年浙江第一銀行太子爺孔令成向李國寶下戰書，最後都畀佢喺金融界百多名選民中攞到八十九票連任。之後嘅幾屆選舉，佢都自動當選為議員。但自從李國寶大懶蛇形象深入民心後，佢又幫特首候選人唐英年擔任競選辦主席，大家人氣都係咁上下，互相扯後腿有之，今次生肖又同立法會選舉日相沖，今屆畀人翻盤絕唔係奇事。

而五一年出世嘅現任議員就有成六個咁多，包括建制派嘅民建聯黃容根、經濟動力梁君彥，而泛民嘅代表就有何俊仁、人民力量黃毓民同社福界張國柱等。特首候選人鐵頭仁自參選以嚟一直畀人當透明，多個民意調查顯示佢嘅支持度不足一成，咁搞法都唔知會唔會影響到佢喺立法會選舉嘅選情。白鴿黨涂謹申六三年出世，生肖都係屬兔，呢批兔佬議員選舉日都有先天弊病，想繼續喺議事廳噴口水花，真係要醒醒定定。