百擒百縱護淫媒 餘孽政棍一擔擔

假如，違反《淫褻及不雅物品管制條例》係一項比賽，淫賤黎認咗第二，絕對冇人敢認第一。已有百幾次案底嘅壹淫媒，自從旗下免費報《爽報》獻世後，短短時間又極速增加咗廿三項不雅物品評級紀錄，收到二百幾宗投訴，堪稱前無古人，後無來者！

最令人嘆為觀止嘅係，放生淫賤黎呢齣鬧劇，港英餘孽做極都唔厭，以前百擒百縱唔在講，今次《爽報》廿三項不雅個案，影視處居然只係選擇性票控十一項，其餘十二項統統放生；而法庭就更加仁慈，十一項票控合共罰款十一萬元，每項罪名輕罰一萬，問你服未！

大家知唔知，點解《爽報》廿三項不雅個案中，十二項網上文章聲音版全部被放生呢？影視處嘅理由搞笑咯，話網站已刪除咗相關聲帶喎，所以不作起訴。

按照咁嘅邏輯，劫匪就冇有怕咯，話之你有成棚目擊證人，甚至成個搶劫過程被閉路電視影低，只要搶完即刻收埋贓物，咁就冇人吹得佢脹。仲有吖，使假銀紙都冇事啫，被人踢爆，大不了將假鈔吞晒落肚，咁咪告唔入囉。

嗱，淫審處前審裁員兼執業大律師龔靜儀就講得啱嘞，如果「放上網、犯過法」嘅聲帶只要被刪除就冇事，會令不良傳媒走法律罅，而不會被起訴，更會令其他人有樣學樣，荼毒青少年，遺禍無窮呀！

學者宋立功更加直斥淫審制度及法律落後，網絡世界無遠弗屆，若影像及聲音不受規管，變相鼓勵不良聲帶流通，受害最深嘅就係心智未成熟嘅青少年。

不過，話時話吖，壹淫媒一次又一次違例，結果一次又一次被放生，原因又點只制度落後、法律過時咁簡單吖，歸根究柢，根本就係港英餘孽蓄意包庇。講番《爽報》被輕輕罰款十一萬元吖，簡直不痛不癢，淫賤黎當係經營成本嘅咋！

治淫媒，用重典。正如龔靜儀話齋，對付屢犯不改嘅不良傳媒，罰款應以累進式遞增，犯得愈多，罰得愈重，否則無法收到阻嚇作用。咦，如果真係咁嘅話，壹淫媒累積犯案百幾宗，隨時罰到破產，香港咪可以見到青天！

講開又講，港英餘孽同淫賤黎固然沆瀣一氣，而公民黨及民主黨政客亦係一擔擔嘅咋。早前十八個民間團體出席立法會會議，聲討《爽報》宣淫販賤，點知嗰班平時滿口仁義道德嘅政客居然詐傻扮懵，連《爽報》兩個字都唔敢提。唉，咁又難怪嘅，淫賤黎係公民黨及民主黨最大金主，受人錢財，替人消災吖嘛，佢哋根本就係着埋同一條褲。計太一叮話齋，選民最緊要帶眼識人，下次選舉時一定要認住呢班無恥政棍吖，叮！